رپورٹ: ابوالفیض خلیلی
ـــــــــــــــــــــــــــــــــــــــ
مبارکپور/اعظم گڑھ(آئی این اے نیوز 9/جولائی 2017) عالمی شہرت یافتہ الجامعۃ الاشرفیہ مبارکپور کے سابق نائب شیخ الحدیث علامہ حافظ عبد الرؤف علیہ الرحمہ کے 47ویں عرس کے موقع پر جامعہ اشرفیہ کی عزیز المساجد میں آج ایک خصوصی اجلاس کا انعقاد کیا گیا، جس میں دارالقلم دہلی کے بانی و مہتمم مولانا یٰسین اختر مصباحی نے خطاب کرتے ہوئے کہا کہ حافظ عبدالرؤف کا سب سے بڑا کارنامہ امام احمد رضا خاں بریلوی کی تصنیف فتاویٰ رضویہ کی ترتیب و تدوین اور اشاعت کے ساتھ ہی الجامعۃ الاشرفیہ عربی یونیورسٹی کا قیام بھی ہے، یونیورسٹی کا پورا خاکہ انہوں نے ہی تیار کیا تھا، ان کی خداد صلاحیت کی بنا پر ہی بانی جامعہ حافظ ملت علیہ الرحمہ نے انہیں اپنا دست و بازو بنا لیا تھا، مولانا یٰسین اختر مصباحی نے مزید کہا کہ مولانا احمد رضا خاں کی شہرہ آفاق تصنیف فتاویٰ رضویہ کی غیر مطبوعہ نسخ جب بریلی کے کتب خانہ میں کیڑے کی نذر ہو رہے تھے تو حافظ عبد الرؤف نے ہی اس کی ترتیب و تدوین اور اشاعت کا بیڑا اٹھایا تھا الجامعۃ الاشرفیہ کے سربراہ اعلیٰ علامہ عبدالحفیظ نے اپنے ناصحانہ خطاب میں طلباء جامعہ سے کہا کہ وہ اپنی محنت و لگن سے حافظ عبدالرؤف کے جانشین بننے کی کوشش کریں کیونکہ مرحوم صرف اپنی محنت سے ہی اس مقام پر فائز ہوئے تھے.
