رپورٹ: ایڈیٹر انچیف
ــــــــــــــــــــــــــــــــــ
کانپور(آئی این اے نیوز 15/ستمبر2017) بہار سیلاب متأثرین کی مدد کو پہلے ہی دن سے موجود جمعیت علماء ہند و جمعیت علماء بہار کے کارکنان پوری دلجمعی کے ساتھ ریلیف کے کام میں لگے ہوئے ہیں، سیلاب کا پانی اترنے کے بعد صورتحال بہت زیادہ نازک ہے، گندے پانی اور کیچڑ کی وجہ سے وبائی امراض کا خطرہ بڑھتا جارہا ہے۔ دسیوں ہزار خاندانوں کے کھانے پینے اورطبی سہولیات کے بعد جمعیت علماء ہند کی جانب سے مولانا حکیم الدین قاسمی سکریٹری جمعیت علماء ہند کی سربراہی میں نئے مکانات کی تعمیر کا سلسلہ شروع ہوچکا ہے، جمعیت علماء شہر کانپور کی جانب سے جمعیۃ علماء اترپردیش کے صدر شہر کانپور کے قائم مقام قاضی حضرت مولانا محمد متین الحق اسامہ صاحب قاسمی نے کئی لاکھ روپئے خرچ کرکے 700 خاندانوں کے لئے کھانے پینے، بچوں کے دودھ و دیگر ضروریات زندگی پر مشتمل کٹس تقسیم کرنے، عید الاضحی کے موقع پر تقریباً 10 بڑے جانوروں کی قربانی کرانے اور 5لاکھ روپئے کی نقدی جمعیت علماء ہند کے مرکزی دفتر نئی دہلی میں جمع کرنے کے ساتھ دو درجن مکانات بنوانے کا فیصلہ لیا ہے جن میں 3مکانات کی تعمیر شروع کردی گئی ہے۔
بان خیالات کا اظہار مولانا اسامہ کی طرف سے بھیجے گئے جمعیت علماء شہر کانپور کے رکن اور جامعہ محمودیہ اشرف العلوم کے استاذ مولانا اظہار مکرم قاسمی نے سیلاب زدہ علاقوں کے دورہ سے واپس آنے کے بعد کیا۔
مولانا اظہار مکرم قاسمی نے بتایا کہ امیرالہند حضرت مولانا قاری سید محمد عثمان منصورپوری صدر جمعیۃ علماء ہند و جانشین فدائے ملت حضرت مولانا سید محمود مدنی جنرل سکریٹری جمعیۃ علماء ہند کی ہدایت پر مسلمانان ہند کی سب سے بڑی تنظیم جمعیۃ علماء ہند و جمعیت علماء بہار کے ذمہ داران و کارکنان بہار و سیمانچل کے مختلف علاقوں میں پوری طرح سے سرگرم عمل ہے، جمعیۃ کی مرکزی و صوبائی ٹیم گزشتہ ایک ماہ سے تمام متأثرہ اضلاع خصوصاً سب سے زیادہ متأثر کشن گنج، ارریہ، پورنیہ اور کٹیہار کے سیلاب متاثرہ علاقوں میں راحت رسانی کے کام میں مصروف ہے،جمعیت علماء کی جانب سے اب تک تیس ہزار سے زائد خاندانوں کو کھانے پینے و ضروریات زندگی سے متعلق اہم اشیاء تقسیم کی جاچکی ہیں، درجنوں مقامات پر مفت طبی سہولیات کیلئے میڈیکل کیمپ لگائے گئے ہیں، عید الاضحی کے موقع پر تقریباً 699بڑے جانوروں اور کچھ چھوٹے جانوروں کی قربانی کرائی گئی ہے، جمعیۃ علماء ہند کی جانب سے سیلاب متاثرین کی مذکورہ امداد کے ساتھ ان کی مستقل بازآبادکاری کیلئے اب تک سو سے زائد مکانات کی بنیاد رکھی جا چکی ہے جس میں ابھی 3 مکانات جمعیت علماء شہر کانپور جانب سے تیار کئے جارہے ہیں۔ اُنہوں نے بتلایا کہ اس سیلاب سے ہزاروں نہیں بلکہ لاکھوں لوگ بے گھر ہو چکے ہیں جو کھلے آسمان کے نیچے زندگی بسر کرنے پر مجبور ہیں، ان کا کوئی پرسان حال نہیں ہے، سرکاری سطح پر جو مدد کی امید تھی وہ اب تک نظر نہیں آرہی ہے۔ جمعیت علماء شہر کانپور کی جانب سے متاثرین کیلئے لاکھوں روپیوں کی ضروری اشیاء، کھانے پینے و بچوں کے دودھ وغیرہ کی کٹس، رہنے کے لئے پلاسٹک، بانس و رسی کے مکانات کے علاوہ متأثرین کو نقدی بھی تقسیم کی جاچکی ہیں اور اب دو درجن مکانات بنوانے کا فیصلہ لیا گیا ہے جن میں تین مکانات کی تعمیر شروع ہوچکی ہے۔
جمعیت علماء اترپردیش کے صدر مولانا محمد متین الحق اسامہ قاسمی جو اس وقت دہلی کے دورہ پر ہیں انہوں نے کہا کہ انسانی ہمدردی رکھنے والے ہر فرد کی یہ اولین ذمہ داری ہے کہ وہ ان بے سہارا مصیبت زدہ لوگوں کی مدد کو آگے آئیں، جمعیت علماء ہند کی جانب سے اب تک تقریبا دو کروڑ کی رقم خرچ کی جاچکی ہے، لیکن نئے مکانات کی تعمیر کیلئے اب بھی لاکھوں لاکھ روپئے کی ضرورت ہے۔ انہوں نے مصیبت کی اس گھڑی میں متأثرین کی مدد کیلئے تعاون کرنے والے سبھی لوگوں کو سراہتے ہوئے کہا کہ آپ حضرات اپنا تعاون جاری رکھیں، آپ کا یہ تعاون آپ کے لئے صدقہ جاریہ ہوگا اور دنیا و آخرت میں چین و سکون اور کامیابی کا سبب بنے گا،مولانا اظہار مکرم نے مولانا متین الحق اسامہ قاسمی کے حوالہ سے بتلایا کہ سیلاب متأثرین کیلئے کئی لاکھ روپئے پر مشتمل امداد کی چوتھی قسط جلد ہی بہار روانہ کی جائے گی۔
