شہریت ترمیمی بل پارلیمنٹ سے پاس ہوا تو میں مسلمان بن جاؤں گا‘

ہرش مندر نے کہا کہ ’’بغیر دستاویز والے مسلمانوں کو ڈٹنشن سنٹر میں جو سزا دی جائے گی میں اسی سزا کو بھگتنے کے لیے تیار ہوں اور یہاں کی اپنی شہریت چھوڑ کر تحریک عدم تعاون میں شامل ہو جاؤں گا

نئی دہلی :11 دسمبر 2019

سابق آئی اے ایس افسر اور حقوق انسانی کارکن ہرش مندر لوک سبھا میں شہریت ترمیمی بل 2019 پاس ہو جانے سے کافی مایوس ہیں۔ ان کا کہنا ہے کہ یہ بل ہندوستانی آئین اور اقدار کے بالکل خلاف ہے۔ منگل کے روز میڈیا سے بات چیت کرتے ہوئے کہا کہ اگر شہریت ترمیمی بل پارلیمنٹ سے پاس ہو جاتا ہے تو وہ خود کو باضابطہ طور پر مسلم اعلان کر دیں گے۔ اس کے ساتھ ہی ہرش مندر نے کہا کہ جب این آر سی کے دوران انھیں اپنے دستاویز جمع کرنے کے لیے کہا جائے گا تو وہ ایسا کرنے سے بھی انکار کر دیں گے۔

ہرش مندر نے مودی حکومت کی پالیسیوں کو ملک مخالف ٹھہراتے ہوئے کہا کہ ’’این آر سی کے لیے کوئی بھی دستاویز جمع کرنے سے میں منع کر دوں گا اور اپنے لیے اسی سزا کا مطالبہ کروں گا جو مسلمانوں کے لیے طے کیا جائے گا۔‘‘ انھوں نے مزید کہا کہ ’’بغیر دستاویز والے مسلمانوں کو ڈٹنشن سنٹر (قیدخانہ) میں جو سزا دی جائے گی میں اسی سزا کو بھگتنے کے لیے تیار ہوں اور یہاں کی اپنی شہریت چھوڑ کر تحریک عدم تعاون میں شامل ہو جاؤں گا۔‘‘

ہرش مندر نے الزام عائد کرتے ہوئے کہا کہ حکومت شہریت ترمیمی بل کے ذریعہ غیر مسلم طبقات کی دفاع کرنے کے بعد این آر سی صرف مسلمانوں کے لیے نافذ کرے گی۔ ہرش مندر نے سدا ٹائمز سے بات چیت کے دوران وضاحت پیش کرتے ہوئے کہا کہ ’’بی جے پی کا منصوبہ ہے کہ وہ پہلے شہریت ترمیمی بل کے ذریعہ غیر مسلم طبقات کے لوگوں کو بچاؤ کرے گی اور پھر اس کے بعد این آر سی نافذ کرے گی۔ آپ کہہ سکتے ہیں کہ این آر سی ایک طرح سے صرف مسلمانوں کے لیے نافذ ہوگا۔‘‘

حقوق انسانی کارکن ہرش مندر نے اپنی بات رکھتے ہوئے میڈیا کو بتایا کہ ایک بار سیاست اور قانون کو ایک کنارے بھی رکھ دیا جائے تو صرف ہمدردی کے پیش نظر دیکھیے کہ آپ لاکھوں غریب لوگوں کے ساتھ کیا کرنے جا رہے ہیں۔ کوئی حکومت کس طرح کسی آفت کو مدعو کر سکتی ہے، جس کا کوئی اختتام نظر نہیں آ رہا۔

واضح رہے کہ شہریت ترمیمی بل پیر کے روز لوک سبھا میں پاس ہو گیا۔ اس بل کے حق میں 311 ووٹ اور خلاف میں 80 ووٹ پڑے۔ یہ بل بدھ کو راجیہ سبھا میں پیش کیا جا سکتا ہے۔ شہریت ترمیمی بل کو گزشتہ بدھ کابینہ سے بھی منظوری مل چکی ہے۔ اس بل میں پڑوسی ممالک پاکستان، بنگلہ دیش، افغانستان سے 31 دسمبر 2014 سے پہلے آنے والے ہندو، سکھ، بودھ، عیسائی، جین اور پارسی طبقہ کو شہریت دینے کی سہولت دی گئی ہے۔ اس بل میں مسلمانوں کو باہر رکھا گیا ہے۔

اشتہار، خبریں اور مضامین شائع کرانے کیلئے رابطہ کریں…

Tuesday, 10 December 2019

شہریت ترمیمی بل پارلیمنٹ سے پاس ہوا تو میں مسلمان بن جاؤں گا‘