حافظ شجاعت ٹرسٹ کے چیف شمس الضحی خان کی وزیر ریل سے اپیل
آنند نگر مہراج گنج: 6 جنوری 2020 آئی این اے نیوز
( عبید الرحمن الحسینی) مشرقی یوپی کے ضلع مہراج گنج میں واقع آنندنگر ریلوے اسٹیشن سے عوام کی پریشانیوں کو دیکھتے ہوئے حافظ شجاعت فیض عام چیریٹیبل ٹرسٹ کے چیف شمس الضحی خان نے وزیر ریل سے اپیل کی ہے کہ آنند نگر سے دہلی (وایا لکھنو بریلی مراداباد) کیلئے ٹرینس چلائی جائیں تاکہ عام لوگوں کو سہولت مل سکے، آنند نگر سے دہلی کیلئے صرف ایک ٹرین ہمسفر ایکسپریس ہے، جو پوری اے سی ہے، عام لوگوں کی پریشانیوں کو مدنظر رکھتے ہوئے ایک ایسی ٹرین چلائی جانی چاہیئے جو عام لوگوں کیلئے ہو۔
آنند نگر سے شری ماتا ویشنو دیوی کٹرا ( وایا گونڈہ، سیتاپور، بریلی، سہارنپور، امبالہ) کیلئے چلائی جائے، تاکہ ویشنو دیوی جانے والوں کیلئے آسانی ہو۔
گورکھپور سے دہرادون( وایا آنند نگر، نوگڑھ، گونڈہ، لکھنو، شاہجہاں پور، مرادآباد، نجیب آباد، ہریدوار) کیلئے چلائی جائے تاکہ ہریدوار جانے والے لوگوں کیلئے آسانی ہو۔
واضح ہو کہ آنند نگر ریلوے اسٹیشن سے شمال ہند و نیپال کے لوگ بھی کافی تعداد میں سفر کرتے ہیں۔ اس کے علاوہ ضلع سدھارتھ نگر و بلرام کے لوگ بھی کافی تعداد میں فائدہ اٹھا سکتے ہیں۔ اور اس روٹ پر ٹرین نہ ہونے کی وجہ سے مسافروں کو گورکھپور یا گونڈہ جانا پڑتا ہے۔ جس کی وجہ سے پیسنجرس کو خاصی دشواریوں کا سامنا کرنا پڑتا ہے۔ آنند نگر سے ٹرین چلانے سے مسافروں کو کافی سہولت فراہم ہوگی۔
واضح رہے کہ چیف آف ٹرسٹی حافظ شجاعت فیض عام چیریٹیبل ٹرسٹ شمس الضحیٰ خان نے حکومت سے اس مسئلے پر خصوصی غور وخوض کرنے کی اپیل کی ہے۔
