دہلی: فساد زدہ علاقہ شیووہار میں جمعیۃ کے ذریعہ تعمیراتی کاموں کا افتتاح
جمعیۃ علماء ہند کے جنرل سکریٹری مولانا محمود مدنی کی قیادت میں مشرقی دہلی کے فساد زدگان کے لیے باضابطہ مکانات کی تعمیر کا کام شروع ہو گیا ہے
نئی دہلی: جمعیۃ علماء ہند کے جنرل سکریٹری مولانا محمود مدنی کی قیادت میں مشرقی دہلی کے فساد زدگان کے لیے باضابطہ مکانات کی تعمیر کا کام شروع ہو گیا ہے۔ سنیچر کے روز شیوہار کالونی میں مفتی سید محمد عفان منصورپوری (مدعو خصوصی مجلس عاملہ جمعیۃ علماء ہند و صدر المدرسین جامع مسجد امروہہ) نے خصوصی دعاء کرائی
شیو وہار شمشان گھاٹ کے پاس کے ایک فساد متاثر ہ مکان کے باہر جمعیۃ علماء ہند کے کارکنان اور مقامی ذمہ دار حضرات جمع ہوئے اور اس گھر میں تعمیراتی کاموں کا آغاز ہوا۔ مفتی محمد عفان منصورپوری نے اپنے مختصر خطاب میں امن وامان کے قیام اور باہمی میل ملاپ پر زور دیا ۔ اس موقع پر جمعیۃ علماء ہند کے سکریٹری مولانا حکیم الدین قاسمی کا بھی خطاب ہوا۔
بعد میں جمعیۃ کے نمایندگان نے اندرا وہار میں واقع شہید محمد مرسلین کے گھر جا کر لواحقین سے ملاقات کی جس کی لاش کل گزشتہ جی ٹی بی ہسپتال سے بازیاب ہوئی ہے۔ مرسلین 25 فروری کو مراد نگر سے دہلی آرہا تھا لیکن وہ گھر نہیں پہنچ سکا۔ ان کے بھائی حفیظ الدین نے جی ٹی بی ہسپتال وغیرہ میں کئی بار جا کر اس کی باقیات کو تلاشا لیکن وہ ندارد تھا۔
اس سلسلے میں جمعیۃ علماء ہند کی طرف سے ایڈوکیٹ نیاز احمد فاروقی اور ایڈوکیٹ محمد نور اللہ نے دہلی ہائی کورٹ میں 12 مارچ کو عرضی داخل کی تھی، لیکن اگلے دن ہی تھانے سے کال آ گئی کہ اہل خانہ ایک لاش کی شناخت کرلے، بعد میں جی ٹی بی ہسپتال میں ہی اس کی لاش ملی۔ جمعیۃ علماء ہند کے وفد نے ان کے دو یتیم بچوں سے ملاقات کی اور مرحوم کی مغفرت کے لیے پرسوز دعاء کی، یتیم بچوں کے ہاتھ میں جمعیۃ کی طرف سے نقد رقم دی گئی۔
نیز جمعیۃ علماء ہند نے اعلان کیا کہ ان کو انصاف دلانے کے لیے ہر ممکن مددکی جائے گی ۔ اسی طرح کل جمعہ کو جمعیۃ کی نگرانی دو ہفتہ گزرنے کے بعد طیبہ مسجد کراول نگر میں پہلی بار جمعہ کا اہتمام ہواجس کی وجہ سے آس پاس کے مسلمانوں میں کافی اعتماد پیدا ہوا، وہاں نماز جمعہ سے قبل مولانا مفتی اسجد قاسمی صدر جمعیۃ علماء احمد آباد نے خصوصی خطاب کیا ۔ یہاں جمعیۃ یوتھ کلب کے نوجوان میں انسانی خدمت میں مصرو ف ہیں ، ان کے نگراں ماسٹر ہدایت اللہ صدیقی ، مولانا رفاقت، مولانا واصف ، وعظ امن اپنی ٹیم کے ساتھ سرگرم ہیں ۔
