رپورٹ: محمد دلشاد قاسمی
ــــــــــــــــــــــــــــــــــــــــــــ
کیرانہ/شاملی (آئی این اے نیوز 13/ستمبر 2017)شاملی سے کیرانہ جارہی منی بس میں مدرسہ کے طالب علموں کے ساتھ فسادیوں نے کل شام سات بجے کے آس پاس مار پیٹ کی جس سے طلبہ کو بہت زیادہ چوٹ آئی.
موصولہ خبر کے مطابق شاملی کے کڈانہ کے رہائشی محمد فاروق اور محمد اکرم کیرانہ کے مدرسہ جامعۃ السعادۃ کے عربی سوم کے طالب علم ہیں جو کہ عید الاضحٰی کی چھٹی گزارنے کے بعد واپس کیرانہ مدرسہ جارہے تھے، شاملی سے جب یہ دونوں گاڑی میں کیرانہ کے لیے سوار ہوئے تو کھڑکی کا شیشہ کھولنے کو لیکر بھورا کنڈیلہ رہائشی سچن وپن منیش سے جھگڑا ہو گیا، وہ دونوں طالب علم کچھ دیر تک خاموش رہے مگر وہ فسادی باز نہ آئے اور طرح طرح کے جملہ کستے رہے پھر انہوں نے اسی پر اکتفا نہیں کیا، بلکہ کنڈیلہ بس اسٹینڈ آنے کے بعد اپنے حمایتیوں کو بلا کر دونوں طالب علموں کو بری طرح پیٹا، جس کی وجہ سے محمد اکرم کی حالت نازک بنی ہوئی ہے سر میں شدید چوٹ آنے کی وجہ سے دماغی حالت نازک بنی ہوئی ہے، اس کو کیرانہ کے پرائیویٹ ہسپتال میں ایڈمیٹ کردیا گیا، ادھر طالب علم محمد فاروق نے تھانہ کیرانہ میں نامزد تحریر دی ہے.
آج دوپہر تھانہ کیرانہ چیئرمین محمد راشد کی معیت میں طالب علموں کے متعلقین نے پرزور احتجاج کیا اور مطالبہ کیا کہ ملزموں کو جلد از جلد گرفتار کر کے سلاخوں کے پیچھے پہونچایا جائے، اور گاڑیوں میں سفر کرنے والے طلباء کی حفاظت کو یقینی بنایا جائے.
سی او کیرانہ نے متعلقین کو تسلی دیتے ہوئے کہا کہ بہت ہی جلد فرار مجرم جیل کے اندر ہوں گے اور کسی بھی طرح سے ماحول خراب کرنے والوں کیخلاف سخت کارروائی ہوگی.
