رپورٹ: سمیر چودھری
ــــــــــــــــــــــــــــــــــــ
دیوبند(آئی این اے نیوز 15/ستمبر 2017) دارالعلوم دیوبند کے استاذ حدیث و معروف مبلغ و مناظر مفتی راشد اعظمی کی گاڑی سڑک حادثہ کا شکار ہوگئی، جس میں مفتی موصوف الحمد اللہ محفوظ ہیں جبکہ ان کے ایک ساتھی مولانا عبدالرحمن شدید طور پر زخمی ہوگئے، جن کا علاج مظفرنگر کے پرائیویٹ اسپتال میں جاری ہے۔
نامہ نگار سے گفتگو کرتے ہوئے مفتی راشد اعظمی نے بتایا کہ گزشتہ شب وہ رامپور کے ٹانڈہ بادلی سے بذریعہ کار دیوبند واپس لوٹ رہے تھے، گاڑی میں پانچ لوگ سوار تھے، جیسے ہی گاڑی مظفرنگر اور جانسٹھ کے درمیان پہنچی تو اچانک ایک ٹرک سے ٹکرائی گئی ، جس میں گاڑی کی اگلی سیٹ پر سوار ایک ساتھی مولانا عبدالرحمن شدید زخمی ہوگئے ہیں، جن کا علاج مظفرنگر کے پرائیویٹ اسپتال میں چل رہاہے، باقی الحمد اللہ تمام ساتھی ٹھیک ہیں۔
سڑک حادثہ کی خبر کے بعد طلباء و اساتذہ میں مفتی راشد اعظمی کو لیکر تشویش کی لہر تھی، مفتی موصوف کی خیریت کی خبر کے بعد تمام متعلقین اعز و اقارب، طلباء اور اساتذہ نے راحت کی سانس لی۔ مفتی اعظمی نے مولانا عبدالرحمن کے لئے دعاء صحت کی اپیل کی ہے.
