مدھوبنی محمد سالم آزاد
" مجھے جیل کے اندر مار دیا گیا اور پھر خودکشی کا نام دیاگیا تو آپ لوگ یقین نہ کیجیے گا، میں اتنا بزدل نہیں ہوں کہ خودکشی کرلوں، مجھے ڈر اس بات کا ہےکہ مجھے مار کر یہ لوگ خودکشی ثابت نہ کردیں "
یہ پیغام بھیجا ہے ڈاکٹر کفیل خان نے متھرا کی جیل سے، جس کو پڑھنے کے بعد موجودہ ظالمانہ صورتحال پر دل و دماغ بےساختہ چیخ اٹھتے ہیں
ڈاکٹر کفیل خان پر ہم کئی بار لکھ چکےہیں انہیں اسلیے جیل میں ڈالا گیاہے کہ جب گورکھپور میڈیکل کالج میں یوگی انتظامیہ کی لاپرواہی سے بچے مر رہے تھے اسوقت ڈاکٹر کفیل نے مرتے ہوئے بچوں کو بچایا
جس کےبع انتقامی کارروائی کرتے ہوئے کفیل خان کے گھر پر فائرنگ کروائی گئی، کفیل خان کو جیل میں ڈالا گیا، پھر اس کےبعد انہوں نے این آر سی اور ظالمانہ شہریت ترمیم قانون کے خلاف مسلمانوں کو بیدار کرنا شروع کیا تو انہیں دوبارہ یوگی نے جیل میں ڈال دیا ہے، اور بدترین عذاب خانے میں پھینک دیا ہے، جیل نہیں وہ غلاظت کا ڈھیر ہے جس میں یوگی آدتیہ ناتھ نے کفیل خان کو مرنے کے لیے پھینک دیا ہے_
دوسری طرف خالد سیفی ہے، ایک عظیم انسان، مسلمانوں کا بے لوث ہمدرد، مسلمانوں کا غمخوار اور متحرک لیڈر، ماب لنچنگ، این آر سی، سی اے اے سے لیکر فلسطینی مسلمانوں کے حق میں زمینی سطح پر آوازِ حق اور صدائے انصاف بلند کرنے والا، آسام کے مظلوم مسلمانوں کے پاس پہنچ کر ان کی داد رسی کی کوشش کرنے والا، جھارکھنڈ اور ہریانہ کے مظلوم مسلمانوں کا غم بانٹنے والا، صحیح معنوں میں ایک زمینی لیڈر، ایک خیرخواہ، قوم کے لیے جان کھپانے والا، خالد سیفی، جب دہلی فساد ہوا تو اس وقت مسلمانوں کے اس چلتے پھرتے اور ہردم متحرک وجود کو اٹھا کر امیت شاہ کی دہلی پولیس نے جیل میں ڈال دیا، اور پھر جیل کسٹڈی میں خالد پر مسلمانوں کا ہمدرد بننے کے جرم میں کیا گزری اس کا اندازہ صرف اس سے لگائیے کہ، خالد سیفی کے دونوں پیر توڑ دیے گئے، خالد سیفی آج بھی جیل میں ہے_
مسلمانوں کے درد و غم میں تڑپتے اور ان کی ترقی اور فریاد رسی کے لیے مچلتے رہنے والے یہ دونوں، خالد سیفی اور کفیل خان، جیل کی کال کوٹھری میں زندہ رہنے کی سزا بھگت رہےہیں اسلیے کہ وہ مسلمان ہیں
لیکن اگر ایکطرف ان دونوں بااثر اور گراؤنڈ لیول پر حرکیت کے لحاظ سے مؤقر مظلوموں کے سلسلے میں رائج جماعتوں کی طرف سے خاطرخواہ حمایت نظر نہیں آتی ہے تو وہیں اُن سیکولر جماعتوں کو بھی پہچان لیجیے جن کی حمایت میں ان مظلوموں نے کام کیا تھا
ڈاکٹر کفیل اور خالد سیفی نے، عام آدمی پارٹی اور کنہیا کمار کے حق میں کام کیا تھا، لیکن یہ دوغلے اور اسلام دشمن سیکولر آج منہ میں دہی جمائے مسلمانوں کے ان دونوں لیڈروں پر شدید ظلم کا تماشا دیکھ رہےہیں، بھارت کے موجودہ سیکولر ازم کی حقیقت اسلام دشمنی ہے، اور اسلامی نام لیوا اہل سیکولر جو ہرحال میں شریعت پر مغربی جمہوریت کو برتر قرار دیتےہیں ان کی حقیقت بزدلی ہے، ان دونوں کے اجتماع سے اسلامیت اور اسلامی جانبازوں کی قبر کھودی جاتی ہے، ایکطرف پولیس افسران کو قتل کرنے والا وکاس دوبے فرار ہے، رنگے ہاتھوں دہشتگردی میں گرفتار ہونے والا دیویندر سنگھ ضمانت پر رہا اور دہلی فساد بھڑکا کر سینکڑوں زندگیاں اجاڑنے والا کپل مشرا آزاد ہے تو وہیں انسانیت اور انصاف کی خدمت کرنے والے جیلوں میں بند کرکے قانون کے رکھوالوں کے ہاتھوں درندگی سے پیٹے جارہےہیں، انہیں قتل کرنے کی کوشش ہورہی ہے، ایسے قانونی نظام کو ظلم کی دیوی، اس نظام کو کندھا دینے والی جمہوریت کو مفلوج اور اس کے سیکولر نعرے کو ظالمانہ اور دوغلا نہیں تو کیا کہا جائے؟
الله ہمارے تمام اسیروں کی رہائی کے سامان مہیا فرمائے، ہمارے مظلوم ہمدردوں کی کفالت فرمائے، جو لوگ ہماری خاطر ظالم جیلوں میں اذیتوں کے شکار ہیں اللہ ان کے دلوں میں ایمان کی روحانی راحت ڈال دے اور اسلامی نظامِ عدل کو حکمرانی عطاء فرما_
