تعلیم قوموں کی ترقی و زوال کی وجہ!

مولانا مزمل الحق راشد ندوی
ـــــــــــــــــــــــــــــــــــــــ
آج کے پرآشوب اور تیز ترین دور میں تعلیم بہت اہمیت کی حامل ہے زمانہ کتنی ہی ترقی کرلے تعلیم کی اہمیت کو نظر انداز نہیں کیا جا سکتا ہمارے معاشرے میں جس سرعت سے انسانی قدروں کا زوال عمل پزیر ہے اور لوگوں میں رواداری کا فقدان ہورہا ہے اس کے لئے طلباء کی بہترین تعلیمی رہنمائی کے ساتھ ان کی کردار سازی بھی اعلی تعلیم کے اہداف کا ماحصل ہونا چاہئے انسانی ذہن کو اگر بچپن ہی سے تعلیم و تہذیب کی اعلی روایات کی تشکیل کی جانب مائل کردیا جائے تو معاشرتی

و سماجی امن و استحکام کی راہ میں کوئی رکاوٹ حائل نہیں ہو سکتی تعلیم کے بغیر کوئی بھی سماج خود اعتمادی کے ساتھ منزل کی طرف قدم نہیں بڑھا سکتا اس لئے ہمیں ہر اس پیش رفت کی قدر کرنی چاہیے جس کا رشتہ تعلیم سے جڑا ہو تعلیم ہر انسان کی بنیادی ضرورت کا حصہ ہے تعلیم ایک ایسی قیمتی چیز ہے جسے نہ کوئی چھین سکتا ہے اور نہ ہی اسے کوئی تقسیم کر سکتا ہے سماج کے ہر شخص کی ذمہ داری بنتی ہے کہ وہ جہالت کے خاتمے کیلئے اجتماعی طور پر کوشش کرے اس کے لئے وہ طریق کار اپنائے جو نئی نسل کے شاندار مستقبل کو یقینی بنا سکے تعلیم قوموں کی ترقی و زوال کی وجہ بنتی ہے تعلیم صرف ڈگریاں یا سند حاصل کرنے کا مقصد نہیں ہونا چاہئے بلکہ اس کا بنیادی مقصد یہ ہونا چاہیے کہ آدمی خود کو تہذیب و شرافت کے سائے میں ڈھال کر معاشرتی روایات و اقدار کی پاسداری اور سماج کے بکھرتے تانے بانے کی اصلاح کیلئے عملی پیش رفت کرے تعلیم ہی سے انسان کی کردار سازی ممکن ہے تعلیم کی بہتری کیلئے ہر ممکن کوشش کرنی چاہئے اس کے ساتھ بالکل کوئی رعایت یا سیاسی سمجھوتا نہیں کرنا چاہیے ہر اسکول پر نظر رکھنی چاہیے جو طلباء کے مستقبل سے کھیلنے کی کوشش کررہے ہوں یا جنکا مقصد صرف تجارت ہو اور تعلیم سے ان کا دور دور کا بھی رشتہ نہ ہو ایسے اداروں پر سخت کاروائی ہونی چاہیے بچے ہمارے ملک اور قوم کا مستقبل ہیں ہم سب کو اپنے مستقبل کی فکر کرنی چاہیے ورنہ آنے والی نسلیں ہمیں کبھی معاف نہیں کریں گی.