تحریر: مولانا محمد نوشاد نوری قاسمی
ـــــــــــــــــــــــــــــــــ
خبر موصول ہوئی ہے کہ نیشنل ایجوکیشنل پالیسی کے سلسلے میں مرکزی حکومت کی جانب سے بنگلور میں منعقد کی گئی کانفرنس میں، ام المدارس دارالعلوم دیوبند کے نمائندہ نے شرکت کی، اور مفید تعلیمی تجاویز پیش کیں، یہ پہلی بار نہیں ہے کہ دارالعلوم دیوبند نے ملک وملت کے مفاد میں، اپنی حصہ داری دکھائی ہو؛ بلکہ تاریخ گواہ ہے کہ ملک جب بھی داخلی یا خارجی فتنہ کی زد میں ہوا تو دارالعلوم دیوبند کے جیالوں نے اس میں غیر معمولی سرگرمی کا اظہار کیا ہے، کاروان دارالعلوم دیوبند کا شعار ہی یہ رہا ہے:
ـــــــــــــعــــــــــ
سوبار سنوارا ہے ہم نے اس ملک کے گیسوئے برہم کو
یہ اہل جنوں بتلائیں گے ، کیا ہم نے دیا ہے عالم کو
دارالعلوم دیوبند کی طرف سے جو تجاویز سامنے آئی ہیں، وہ ملک وملت کے لیے یکساں مفید ہیں۔
دار العلوم دیوبند نے بنیادی طور سے تین تجاویز رکھی ہیں: (۱) تعلیم کو سیکولر رکھا جائے، کسی مذہبی مضمون کو جیسے یوگا وغیرہ كو اختیاری مضمون کی حیثیت سے پڑھايا جاسکتا ہے (۲) حکومت مدرسہ بورڈ کے نصاب میں دخل اندازی سے گریز کرے (۳) فضلائے مدارس کو حکومت تعلیم یافتہ تسلیم کرے۔
بلا شبہ یہ تینوں تجاویز اپنی جگہ بہت ہی مفید اور کار آمد ہیں ؛ ان میں سب سے اہم تجویز آخری تجویز ہے، جس میں فضلائے مدارس کو تعلیم یافتہ تسلیم کرنے کی بات کہی گئی ہے، حقیقت یہ ہے کہ یہ صرف ایک تجویز نہیں ہے؛ بلکہ ہمارے اداروں اور ان کے فضلاء کے قومی تشخص کا مسئلہ ہے، حکومت کی نظر میں مدارس اسلامیہ نہ تو تعلیمی مراکز ہیں اور نہ ہی فضلائے مدارس تعلیم یافتہ افراد، ہم قومی دھارا سے بالکل الگ ہیں، اس تعلق سے ہمارے فضلاء کی بے چینی روز افزوں ہے، اس ضرورت کا اظہار فضلاء دارالعلوم دیوبند مختلف اسٹیجوں سے کرتے رہے ہیں اور اپنے بڑوں پر بے توجہی کا الزام دھرتے رہے ہیں۔
۲۰۱۵ء میں مولانا آزاد نيشنل اردو یونیورسیٹی کی جانب سے شہر لكھنؤ میں منعقد ایک تعلیمی کانفرنس میں حضرت مولانا محمد سالم قاسمی صاحب صدر مهتمم دار العلوم وقف دیوبند کی ہدایت پر مولانا محمد شکیب قاسمی صاحب(استاذ دار العلوم وقف ديوبند و ڈائریکٹر حجۃ الاسلام اكيڈمی) نے شرکت کی، اور اس ضرورت کا مطالبہ کیا کہ حکومت ہمارے موجودہ ڈھانچہ کو تسلیم کرے، اس وقت بھی بہت سے لوگوں نے اس اقدام کو خوش آئند پیش رفت قرار دیا تھا، اب دارالعلوم دیوبند نے بھی یہی تجویز پیش کرکے اس کی معقولیت پر مہرتصدیق ثبت کردی ہے، دارالعلوم دیوبند ام المدارس ہے، بحمد اللہ اس کے پاس اسباب و وسائل کی کمی نہیں ہے، رابطہ مدارس اسلامیہ کی شکل میں ایک بہترین پلیٹ فارم موجود ہے، ضرورت ہے کہ اس تجویز کو تحریک کی شکل دی جائے، جزوی اور فروعی مسائل کے لیے نہ جانے ہم نے کتنی کانفرنسیں اور جلسے منعقد کرلیے، مدارس اسلامیہ نہ تو حکومت سے کسی قسم کا تعاون لیتے ہیں اور نہ ہی اس کے خواہاں ہیں، مفت میں ملک و ملت کیلیے بہترین افراد تیار کرتے ہیں، ملک وقوم کی گردنیں ان مدارس کے احسانات سے گراں بار ہیں، مدارس کو تعلیمی مراکز اور فضلائے مدارس کو تعلیم یافتہ شمار کرنا ان مدارس کا بنیادی حق ہے. اور جب ضرورت ہماری ہے تو اس کے حصول کے لیے جدوجہد اور کوشش بھی ہمیں ہی کرنی ہوگی۔
مجھے یقین ہے کہ یہ انتہائی ضروری اور معقول تجویز “صدا بصحرا” ثابت نہیں ہوگی ؛ بلکہ ہمارے اکابرین ،ذمہ داران دارالعلوم دیوبند اس حق کے حصول تک اپنی مخلصانہ جدوجہد جاری رکھیں گے، اخلاص کے اس تاج محل کو اپنے مطالبے کو تسلیم کرانے میں ان شاء اللہ زیادہ دقت اور پریشانی کا سامنا نہیں کرنا پڑے گا کہ:
“اس کاخ فقیری کے آگے شاہوں کے محل جھک جاتے ہیں”۔)
مضمون نگار نوجوان اسلامی اسکالر اور دارالعلوم وقف دیوبند کے موقر استاذ ہیں.
سرائے میر/اعظم گڑھ(آئی این اے نیوز 23/جنوری 2018) قاسمی کمپیوٹر انسٹی ٹیوٹ سراۓ میر اعظم گڈھ کے طلبہ کا یوم جمہوریہ کے موقع پر بیداری پروگرام بعنوان "یوم جمہوریہ اور ہماری ذمہ داری" کل 24 جنوری بروز بدھ دن میں ایک بجے انسٹی ٹیوٹ پر منعقد ہوگا اس پروگرام کی صدارت محمد فیصل اعظمی اور مھمان خصوصی کے طور پر مفتی اشفاق احمد اعظمی، مولانا انیس احمد اصلاحی، ڈاکٹر اختر حنفی، مولانا افضل قاسمی، مفتی محمد اعظم اعظمی ان شاء اللہ شرکت کریں گے، جس میں تقریبا 24 طلبہ قاسمی کمپیوٹر انسٹی ٹیوٹ اردو ہندی اور انگلش میں اسی عنوان کے تحت اپنا مضمون پیش کریں گے، جس کے بعد لوگوں کے یوم جمہوریہ کے تٸیں بیداری اور جمہوریت کی بقا اور سالمیت آج کی موجودہ صورت حال میں کس طرح سے ہو، اس کو شوشل نیٹ ورکنگ کے ذریعہ لوگوں تک پہونچائیں گے.
