رپورٹ: محمد یاسین صدیقی
ــــــــــــــــــــــــــــــــــــــــــــ
کشن گنج(آئی این اے نیوز 28/اگست 2017) مقبول و معروف شاعر اور سماجی کارکن عمران پرتاپگڑھی نے سیمانچل کے بدترین سیلاب زدہ علاقوں کا دورہ کیا اور علاقے کے ممبر پارلیمنٹ و معروف عالم دین مولانا اسرارالحق قاسمی کی نگرانی میں متاثرین کے بیچ ریلیف و امداد تقسیم کی، انھوں نے ملک کے تمام لوگوں سے اپیل بھی کی کہ وہ متاثرین کی امداد کے لئے آگے آئیں، انھوں نے مولانا قاسمی کے جذبے کی ستائش کرتے ہوئے کہاکہ ایسے وقت میں جبکہ مرکز و بہار کی حکومتیں بھی سیمانچل کے سیلاب زدگان پر خاطر خواہ دھیان نہیں دے رہی ہیں، مولانا قاسمی خود تمام علاقوں میں جاکر لوگوں تک راحت اشیاء پہنچا رہے ہیں اور ان کی امداد کی ہر ممکن کوشش کر رہے ہیں، انھوں نے کہا کہ سیمانچل کے قیامت خیز سیلاب کے نتیجے میں مواصلاتی ذرائع ناکارہ ہو گئے ہیں، سڑکیں تباہ ہوچکی ہیں اور ایک جگہ سے دوسری جگہ پہنچنا دشوار ہوچکا ہے، حتی کہ موبائل فون کے ذریعہ بھی رابطہ ممکن نہیں ہے، ایسے سنگین حالات میں مولانا قاسمی جس طرح رات دن ایک کرکے اپنی عمر اور صحت کی پرواہ کیے بغیر کہیں موٹر سائیکل سے، کہیں آٹو رکشہ سے اور بہت سے مقامات پرپانی اور کیچڑ میں پیدل چل کر متاثرین کے پاس پہنچ کر نہ صرف ان کی دادرسی کر رہے ہیں بلکہ ان کی مشکلات دور کرنیکی بھی کوشش کر رہے ہیں، اس سے ہم جیسے نوجوانوں کو حوصلہ ملتا ہے اور کام کرنے کی ہمت پیدا ہوتی ہے، انھوں نے مولانا کے جذبۂ خدمت کا خاص طور پر ذکر کیا اور کہا کہ میں یہ دیکھ کر بیحد متاثر ہوا کہ مولانا محترم رات کے ڈھائی تین بجے تک عوام کے درمیان رہ کر ان کی پریشانیوں اور مشکلات کو دورکرنے کی تدبیر کر رہے ہیں، بین الاقوامی شہرت یافتہ شاعر نے کہا کہ آج کے وقت میں ہندوستان کو ایسے ہی قائد اور رہنما کی ضرورت ہے جو عوام کے دکھ درد کے وقت ان کے غم میں شریک ہو اور ان کی پریشانیوں کو دور کرنے کی ہر ممکن تدبیر کرے، انہوں نے مولانا قاسمی اور آل انڈیاتعلیمی و ملی فاؤنڈیشن کی ٹیم کا شکریہ ادا کرتے ہوئے کہا کہ انہوں نے سیلاب زدہ علاقوں تک پہنچنے میں میری مدد کی جسکے بغیر وہاں میرا پہنچنا ممکن نہیں تھا۔
واضح رہے کہ عمران پرتاپگڑھی نے اپنے احباب کے ساتھ مل کر سیمانچل کے سیلاب زدہ علاقوں کا دورہ کیا اور مولانا اسرارالحق قاسمی کی نگرانی میں متاثرین کے بیچ اشیاء خورد و نوش تقسیم کیں۔اس موقع پر مولانا قاسمی نے مصیبت زدگان کے ایک مجمع کے سامنے عمران پرتاپگڑھی کو دعائیں دیتے ہوئے کہا کہ یہ ایسے شاعر ہیں جنہیں سننے کے لئے ملک و بیرون میں لاکھوں لوگ اکٹھا ہوتے ہیں اور یہ نوجوانوں کے درمیان نہایت مقبول و معروف ہیں، مگر اس سے بھی بڑھ کر ان کا دینی و ملی جذبہ قابل قدر ہے۔جہاں عمران پرتاپگڑھی اپنی بیباک شاعری کے ذریعہ حکمرانوں کو جھنجھوڑتے اور مظلوم و اقلیتی طبقات کے مسائل پر کھل کر اظہار خیال کرتے ہیں، وہیں وہ عملی طور پر بھی تمام تر خوف اور اندیشے سے بے پرواہ ہوکر مسلمانوں کو انصاف دلانے کی کوشش کرتے ہیں۔
مولانا قاسمی نے سیمانچل کے تمام سیلاب متاثرین کی جانب سے ان کا شکریہ ادا کیا کہ انہوں نے ان لوگوں کی مصیبت کو اپنا دکھ درد سمجھا اور سیلاب زدہ علاقوں میں خود پہنچ کر ان کی امداد کی، مولانا قاسمی نے امید ظاہر کی کہ درد مند دل رکھنے والے دیگر حضرات بھی خواہ کسی بھی مذہب و مسلک اور شعبہ حیات سے تعلق رکھتے ہوں، عمران پرتاپ گڑھی کی طرح سیمانچل کے سیلاب زدہ علاقوں میں خود پہنچ کر حالات کا جائزہ لیں گے اور انکی امداد کے لئے آگے آئیں گے۔
