کِشتِ دل سے انتخاب

شاعر بسمل اعظمی

عزم و حوصلہ ہمت جب جواں ہوں سینوں میں 

آگ تب لگاتے ہیں اپنے ہی سفینوں میں 

کوششیں ہوئیں اکثر میرے ہم جلیسوں کی 

میں نظر سے گر جاؤں اپنے ہم نشینوں میں 

ذکر جب بھی چھڑتا ہے میری کج کلاہی کا 

آگ سی دہکتی ہے حاسدوں کے سینوں میں 

محفلِ طرب ان کی آج سج گئی ہوگی 

راس آ نہ پائے گی ہر خوشی حسینوں میں 

کام کر گئیں ساری سازشیں زمانے کی 

بال آگئے آخر دل کے آب گینوں میں 

راز کُھل ہی جاتے ایسے نابکاروں کے 

بت چھپائے رکھتے ہیں جو بھی آستینوں میں 

کہہ سکیں وہ لوگوں سے راز ہائے دل بسمل 

حوصلہ کہاں اتنا میرے نکتہ چینوں میں