بٹ کوئن محض ایک فرضی کرنسی ہے، اسکا کاروبار ناجائز اور حرام ہے: شاہ ملت مولانا سید انظر شاہ قاسمی

محمد فرقان
ــــــــــــــــــــ
بنگلور(آئی این اے نیوز 30/جولائی 2018) معروف عالم دین، شیر کرناٹک، شاہ ملت حضرت مولانا سید انظر شاہ قاسمی مدظلہ نے لال مسجد، شیواجی نگر، بنگلور میں ہزاروں مسلمانوں کو بٹ کوئن کی حقیقت بیان کرتے ہوئے فرمایا کہ بٹ کوئن کا کاروبار دن بہ دن بڑھتا جارہا ہے اور لوگ اسکا شکار ہورہے ہیں۔ بٹ کوئن محض ایک فرضی چیز ہے، دھوکہ دھڑی کا نام ہے۔ شاہ ملت نے فرمایا کہ پہلے زمانے میں لوگوں کو کوئی چیز لینی ہوتی تو آپس میں چیزوں کو تبادلہ کرتے۔ اسکے بعد دھیرے دھیرے جب انسانوں نے ترقی کی تو انہوں نے اپنے اپنے ملک کے اعتبار سے کرنسیوں کو بنایا۔ یہ کرنسی بھی محض ایک کاغذ کا ٹکڑا ہے۔ ان میں جو مالیت یاعرفی ثمنیت پائی جاتی ہے اسکی وجہ یہ ہے کہ ان کے پیچھے ملک کی اقتصادی چیزیں ہوتی ہیں۔ مولانا نے فرمایا کہ ملک کی اقتصادی ترقی کا کرنسی کی قیمت اور ویلیو پر اثر پڑتا ہے۔ یہی وجہ ہے کہ اقتصاد ہی کی وجہ سے کرنسی کی ویلیو گھٹتی اور بڑھتی ہے۔

مولانا شاہ قاسمی نے فرمایا کہ ان کرنسی کی ویلیو کے پیچھے کوئی نہ کوئی وجہ ہے لیکن بٹ کوئن کی ویلیو کے پیچھے کوئی وجہ نہیں۔ نیز یہ بھی معلوم نہیں کہ کس نے بنایا؟ کہاں سے آیا؟ اسکی ویلیو کے پیچھے کونسی چیز متعین ہے؟ شاہ ملت نے فرمایا کہ بٹ کوئن محض ایک فرضی کرنسی ہے نیز یہ سٹہ بازی اور سودی کاروبار کا پہلو ہے۔انہوں نے فرمایا کہ آج لاکھوں لوگ اسکا شکار ہیں۔ مولانا نے بتایا کہ یہ جو ادارے ایک لاکھ لیکر پندرہ ہزار اور بیس ہزار منافع دیتی ہے یہ سب بٹ کوئن کا ہی کاروبار کرتی ہے۔ اور جب بٹ کوئن کی ویلیو گھٹ جاتی ہے تو یہ ادارے ختم ہوجاتے ہیں اور بھاگ جاتے ہیں۔ جس کی وجہ سے لاکھوں لوگوں کو نقصان کا سامنا کرنا پڑتا ہے۔
مولانا سید انظر شاہ قاسمی نے فرمایا کہ بٹ کوئن کا کاروبار ناجائز اور حرام ہے۔ اس پر کئی دارالافتاءکے فتوے موجود ہیں اور دارالعلوم دیوبند نے بھی اسکو ناجائز قرار دیا ہے۔مولانا نے مسلمانوں سے اپیل کی کہ ان جیسے کاروبار کرنے والے اداروں میں اپنا پیسہ برباد نہ کریں اور ان سے پرہیز کریں۔ مولانا سید انظرشاہ قاسمی نے فرمایا کہ مسلمان نہ دھوکہ دیتا ہے نہ دھوکہ کھاتا ہے۔