رپورٹ: یاسین صدیقی
ـــــــــــــــــــــــــــــــــــ
واپی/گجرات(آئی این اے نیوز 26/اکتوبر 2017) اس وقت ہمیں اپنے معاشرے میں تعمیری سوچ و فکر کو فروغ دینے کی ضرورت ہے تاکہ ماحول میں اپنائیت، پیار ومحبت، انسانیت کی بنیاد پر ایک دوسرے کے دکھ سکھ میں شریک ہونے کا جذبہ پیدا ہو اور ہماری آنے والی نسل میل ملاپ، اُخوت و بھائی چارہ اور انسانیت نوازی میں مثالی ہو اور قوم و ملک کے لئے نفع بخش ثابت ہوسکے، ان خیالات کا اظہار بزرگ عالم دین و ممبر پارلیمنٹ مولانا اسرارالحق قاسمی نے گجرات کے اپنے چار روزہ تعلیمی واصلاحی دورے کے دوران واپی میں سماجی کارکنان و دانشوران کی ایک مجلس سے خطاب کرتے ہوئے کیا۔
انہوں نے ملک کے موجودہ حالات پر تبصرہ کرتے ہوئے کہا کہ اس وقت فرقہ پرست عناصر کی جانب سے ملک کی آبادی کو مذہبی منافرت میں مبتلا کر کے ملک کو ترقی کی دوڑ میں پیچھے کرنے کی کوشش کی جارہی ہے، عدل وانصاف کے تقاضوں کو پس پشت ڈال کر ملک کو ناقابل تلافی نقصان پہنچایا جارہا ہے، جو سخت تشویش کی بات ہے اور اس کی وجہ سے ملک کے سنجیدہ طبقات میں بے چینی بڑھتی جارہی ہے۔
مولانا نے کہا کہ اگر ملک کی یہی صورت حال رہی تو یقیناً ہندوستان ترقی کی پٹری سے اتر جائے گا اور جہاں اس ملک کی معاشی حالت روز بروز تنزلی کا شکار ہوگی وہیں ملک کا سماجی تانا بانا اور فرقہ وارانہ ہم آہنگی کا ماحول بھی بکھر جائے گا، حکومت کا کام ملک کے عوام کی فلاح و خوشحالی کے لئے کوشش کرنا ہوتا ہے مگر موجودہ حکومت مختلف مذہبی معاملات کو ہوا دے کر ہندوستانی عوام کے مابین فرقہ وارانہ منافرت پیدا کرنے کی کوشش میں سرگرم ہے، انہوں نے ملک کے موجودہ میڈیا کے جانب دارانہ رویے پر بھی تنقید کرتے ہوئے کہا کہ مسلمانوں کے خلاف ماحول سازی میں قومی میڈیا کا افسوسناک رول ہے، بے بنیاد الزامات میں گرفتار ہونے والے مسلم نوجوانوں اور علماء کو بھی خطرناک دہشت گرد کے طور پر متعارف کروایا جاتا ہے لیکن جب یہی لوگ عدالت کے ذریعہ باعزت بری کردیے جاتے ہیں توٹی وی چینلوں اور قومی میڈیا میں ایک خبر تک چلانے کی زحمت نہیں کی جاتی۔ مولانا قاسمی نے اپنے پر مغز خطاب میں ملک کے اصحابِ دانش وفکر سے اپیل کرتے ہوئے کہا کہ ملک کی تعمیرو ترقی اور سماجی ہم آہنگی کو فروغ دینے کے لئے انہیں آگے آنا چاہئے اور اپنا کردار ادا کرنا چاہئے تاکہ ملک کو ان خطرات سے بچایا جاسکے جن کی وجہ سے آج پورے ہندوستان میں افراتفری کا ماحول پیدا ہوگیا ہے اور لوگوں کا باہمی اعتماد ختم ہوتاجارہا ہے۔اس موقع پرحاجی منظور خاں، امتیاز پوپٹ، حافظ عبدالوہاب، مقصود سلی والا، ظفراللہ خان اور ملی فاؤنڈیشن کے سکریٹری مولانا نوشیر احمد کے علاوہ بڑی تعداد میں عوام موجود رہے۔
