دارالعلوم دیوبند کیا ہے؟

ناقل: محمد خالد اعظمی
ـــــــــــــــــــــــــــــــــــــــ
      دارالعلوم دیوبند ایک الہامی مدرسہ ہے ،جس کا منہاج تعلیم عین تعلیمات نبوی کے مطابق ہےجس کو وقت کے  چند اہل اللہ نے تعمیر کیا ،جس کا سرمایہ(توکل علی اللہ )ہے جس کی بنیاد اخلاص وللہیت پر ہے اور جو انگریزوں کی حکومت میں اسلامی اور دینی تعلیمات کو ہندوستان میں خصوصا اور پوری دنیا میں عموماباقی رکھنے کے لیے قائم کیا گیا ہے۔

         دارالعلوم دیوبند ان افکار کا دریا ہے جو سینہءنبوت سے بہکر صحابہ کرام سے ہوتا ہوا ہندوستان میں(شاہ ولی اللہ) کے واسطے سے مولانا محمد قاسم صاحب نانوتوی، مولانا رشید احمد صاحب گنگوہی اور مولانا یعقوب صاحب (رحہم اللہ) کے ذریعے دیوبند منتقل ہوا، جس کی لہریں ہند و پاک کی سرحد سے نکل کر اقطاع عالم میں پھیل گئیں اور عالم اسلام کے تشنگان علوم نبوت بلاواسطہ یا بالواسطہ اپنی پیاس بجھا رہے ہیں۔
     دارالعلوم دیوبند اس علم صحیح کا نام ہے جو برزگان دین نے پیٹ پر پتھر باندھ کر ہم تک پہونچایا ہے ۔
    دارالعلوم دیوبند قرآن و سنت کی اس تعبیر کا نام ہے جو صحابہ کرام تابعین عظام اور سلف امت کے ذریعے ہم تک پہونچی ہے ۔
     دارالعلوم دیوبند سیرت و کردار کی اس خوشبو کا نام ہے جو صحابہ کرام تابعین عظام کی سیرت سے پھوٹی ہے ۔
    دارالعلوم دیوبند اس جہد و عمل کا نام ہے، جس کا سہرا بدر واحد تک پہونچتا ہے ۔
      دارالعلوم دیوبند اس اخلاص وللہیت،تواضع، انکساری،تقوی وطہارت حق گوئی و بے باکی کا نام ہے جو تاریخ اسلام کے ہر دور میں علماء حق کا طرہ امتیاز رہی ہے ۔