یوم جمہوریہ کی تقریب عظیم تاریخ کی یادگار ہے: مفتی ارشد رحمانی

دربھنگہ(آئی این اے نیوز 27/جنوری 2019)یوم جمہوریہ کے موقع پر مکتبہ احمد بازیدپور قلعہ گھاٹ دربھنگہ میں ایک اہم پروگرام منعقد ہوا، پروگرام کا آغاز پرچم کشائی سے ہوا، مفتی ارشد رحمانی قاضی شریعت دارالقضاء امارت شرعیہ دربھنگہ نے ہندوستان کا پرچم لہرایا، پھر مکتبہ احمد کے طلبہ وطالبات نے قومی ترانہ پیش کیا، قومی ترانہ کے بعد مفتی ارشد رحمانی نے خطاب کرتے ہوئے کہا کہ یوم جمہوریہ ایک عظیم تاریخ کی یادگار ہے،

14/اگست 1947ء کویہ ملک انگریزوں کی غلامی سے آزاد ہو گیا اور 26/جنوری 1950ء کو بابا بھیم راؤ امبیڈکر کے ذریعہ تیار کیا گیا دستور اس ملک میں نافذ ہوا اور وہ دستور جمہوری تھا،سیکولر تھا، جس میں ہندوستان کے ہر شہری کو اس کے مذہب، تہذیب و ثقافت، اور رسم و رواج کے ساتھ زندگی گزارنے کی مکمل ضمانت دی گئی تھی اسی لیے آج کے دن پورے ہندوستان میں تقریب منائی جاتی ہے اور اس کی یاد دہانی کرائی جاتی ہے کہ اس ملک کا ہر شہری اس ملک کے دستور کے مطابق امن کے ساتھ اپنی زندگی گزار سکتا ہے، موصوف نے کہا کہ یہ ملک جمہوری ہے یہاں کا دستور جمہوری ہے، یہی وجہ ہے کہ یہاں ہر مذہب کے ماننے والے خوشی ومسرت کے ساتھ مل جل کر اپنی زندگی بسر کرتے ہیں اور اسی وجہ سے ہندوستان مختلف تہذیبوں کا گہوارہ اور گنگا جمنی تہذیب کا علمبردار کہلاتا ہے، موصوف نے کہا کہ وطن سے محبت ہمارے ایمان کا حصہ ہے اس لیے ہمیں اپنا وطن اپنی جان سے زیادہ عزیز ہے، ہم نے ملک کی آ زادی میں اپنی جانوں کا نذرانہ پیش کیا تھا اور ضرورت پڑی تو آ ج بھی ہم اپنے وطن کے لیے جان دے سکتے ہیں، موصوف نے کہاکہ گزشتہ چند برسوں میں اس ملک کی جمہوریت کو خطرہ لاحق ہے اور کچھ ناپاک طاقتوں نے اس ملک کی جمہوریت پر حملے کئے ہیں ہم سبھوں کو مل جل کر ایسے لوگوں کا مقابلہ کرنا ہے اور اپنے وطن کی تعمیر وترقی میں حصہ لینا ہے.
 مولانا نوشاد عالم اشاعتی نے بھی اپنے خیالات کا اظہار کیا، قاری عمران اصلاحی ناظم مکتبہ احمد نے اولا آنے والے مہمانوں کا استقبال کیا ان کا شکریہ ادا کیا اور پھر سامعین کو یوم جمہوریہ سے متعلق اہم باتیں بتائیں، اس کے بعد مکتبہ احمد کے بچوں نے دیر تک مختلف طرح کے پروگرام پیش کئے، بچوں کے درمیان انعامات بھی تقسیم کئے گئے مفتی ارشد رحمانی قاضی شریعت دارالقضاء امارت شرعیہ کے ہاتھوں بچوں کو انعام سے نوازا گیا.
پروگرام میں محلہ اور شہر کے ذمے داروں نے بڑی تعداد میں شرکت کی اور مکتب کی ترقی کے لئے دعائیں کی، قاری عمران اصلاحی کے کلمات تشکر کے ساتھ پروگرام کے اختتام کا اعلان کیا گیا۔