30 / نومبر 2019ء کل جمعہ بعد نماز جمعہ جمعیۃ علماء مبارک پور کے اراکین منتظمہ ومدعوئین خصوصی کی ایک اہم ہنگامی میٹنگ دفتر جامعہ عربیہ احیاء العلوم مبارک پور (قدیم عمارت) میں منعقد ہوئی، میٹنگ کی صدارت حاجی محمد وصی صاحب مبارک پوری نے فرمائی، میٹنگ کا باقاعدہ آغاز قاری محمد قاسم صاحب کی تلاوت سے ہوا، اس کے بعد جنرل سیکرٹری جمعیۃ علماء مبارک پور مفتی احمد الراشد صاحب قاسمی نے سابقہ میٹنگ کی کاروائی کو پڑھ کر سنایا، جس میں مختلف امور کے تعلق سے جو سابقہ میٹنگ میں پاس ہوئے تھے بات چیت ہوئی، جیسے ماہانہ اصلاحی پروگرام، مختلف مساجد میں درس قرآن اور جمعیۃ علماء مبارک پور کے لیے ایک مستقل دفتر کا حصول، بعض امور پر شریک حضرات نے اطمینان کا اظہار کیا، جب کہ بعض کو فوری طور پر پورا کرنے کی بات کہی گئی۔
اس کے بعد آنے والے 12/ دسمبر کو مولانا ارشد مدنی صاحب صدر جمعیۃ علماء ہند کی آمد کے تعلق سے کافی طویل بات چیت ہوئی، جس میں پروگرام کے انعقاد اور اس کے لوازمات پر گفتگو ہوئی اور بہت سے اہم امور طے ہوئے، اور ساتھ ہی بارہ افراد کا ایک بورڈ منتخب کیا گیا جو مختلف امور کے لیے رائے مشورہ کرکے امور کو طے کریں گے اور تمام امور کو پایہ تکمیل تک پہنچانے کی کوشش کریں گے۔
واضح ہو کہ سابقہ میٹنگ میں یہ طے ہوچکا تھا کہ مذکورہ پروگرام محلہ پورہ دلہن میں منعقد ہوگا، جس کا مطالبہ خود وہاں کے ذمہ داروں کی طرف سے کیا گیا تھا، اس کو آج کی میٹنگ میں برقرار رکھا گیا، اس کے علاوہ یہ طے ہوا کہ یہ مذکورہ پروگرام صبح 9/ بجے سے شروع ہو۔
اس میٹنگ میں صدر جمعیۃ علماء ضلع اعظم گڑھ مفتی محمد یاسر صاحب قاسمی، مولانا صدیق احمد صاحب قاسمی صدر جمعیۃ علماء مبارک پور اور مفتی احمد الراشد صاحب قاسمی جنرل سکریٹری جمعیۃ علماء مبارک پور کے علاوہ اراکین منتظمہ کے ساتھ مدعوئین خصوصی کی ایک بڑی تعداد شریک تھی، یہ میٹنگ عصر کی اذان تک چلی۔
آپ حضرات سے درخواست ہے کہ ہونے والے پروگرام کے لیے خصوصی طور پر دعا فرمائیں اور ہر اعتبار سے اپنا قیمتی تعاون پیش فرمائیں۔
