دارالعلوم ندوۃالعلماء کی جانب سے’’ندوہ اوپن یونیورسٹی‘‘ کا قیام

ممبئی :ہندوستان میں تعلیمی تحریک کو مضبوط کرتے ہوئے دارالعلوم ندوۃ العلماء کے فارغین نے اہم کارنامہ انجام دیا ہے ۔اطلاعات کے مطابق دارالعلوم ندوۃالعلماء کی عالمی تنظیم’’ ابنائے ندوۃ العلماء‘‘نے تحریک ندوۃ کا احیاء اور جدید عصری تقاضوں کو ملحوظ رکھتے ہوئے “ندوہ اوپن یونیورسٹی”قائم کرنے کا فیصلہ کیا ہے۔
جمعیۃ شباب الاسلام (الہند) کے آفس سکریٹرمحمدعبدالرشید ندوی کے مطابق مذکورہ ادارے کا قیام امسال ماہ شوال 1441 ھ میں کیا جاچکا تھا ،لیکن اس کا باقاعدہ اعلان ابھی کیا گیا ہے ۔
واضح رہے کہ تحریک ندوۃ العلماء برصغیر میں برطانوی دور میں برپا ہونے والی تحریک ہے جس کا بنیادی مقصد اسلامی مدارس کے نظام و نصاب تعلیم کی اصلاح اور اسے زمانے کے مطابق تبدیل و تجدید کرنا تھا۔ لیکن گذشتہ کچھ برسوں سے یہ تحریک منجمد پڑی ہوئی تھی اوراب ایک نئی کوشش کی گئی ہے کہ “ندوۃ آن لائن یونیورسٹی ” قائم کیا گیا ہےجس کا مرکزی دفتر کنیڈا میں بنایا گیاہے جس میں کنیڈا، امریکہ، برطانیہ، جاپان، اور ساؤتھ افریقہ کے تجربہ کار اساتذہ کا انتظام کیا گیاہے۔دلچسپ بات یہ ہیکہ اس میں عربی اور انگلش میڈیم “کلیتہ الشریعۃ ” قائم کیا گیا ہے ،جس میں تین سالہ B.A کے مساوی کورس کا بھی اہتمام کیا گیا ہے ،ساتھ ہی فاصلاتی تعلیم اور آن لائن تعلیم کا نظم کیا گیا ہے ۔
مزید تفصیلات کے لئے طلبہ تفصیلی معلومات اور داخلہ فارم لکھنؤ کے مرکزی آفس سے رابطہ کرکےحاصل کرسکتےہیں ۔